أقوي خلطات التنظيف من صنع ايديكي وأقل تكلفة

اقدم لكم اليوم اقوي خلطة تنظيف بكل معني الكلمة …
خلطة تقومي بصنعها بيديك في البيت بكل سهولة و غير مكلفة

وداعا للخلطات الكيماوية التي تسبب الامراض التنفسيه ولا تنظف جيدا

الخلطة مجربة مائة بالمائة واقوم باستعمالها في تنظيف منزلي الخاص

نيجي للخلطة ….

المكونات :

  • صابون سائل مثل بريل افضل
  • خل ابيض عادي
  • بيكنج صودا (كربونات الصوديوم) من العطار او السوبر ماركت
  • ملح الليمون يباع عند العطار
  • ليفة تنظيف
  • جوانتي (مهم جدا )

طريقة الخلط :

الكمية علي حسب الحاجة

مثلا

نقوم بخلط كوب من الصابون السائل مع كوب من الخل الابيض

ثم نضع معلقتين من ملح الليمون و نقلب جيدا حتي يذوب الملح

ثم نضف الكربونات فقط في حالة الاستخدام المباشر لانها تجعل الخليط يفور
لذلك يفضل اضافته عند الاستخدام فقط

بمعني انه يمكنك ان تخلطي المكونات الاولي مع الصابون و حفظها في عبوة الصابون بدون اي مشكلة

وعند الاستعمال قومي بوضع الكربوناتو علي الكمية التي ستستخدميها

لان ما نستخدمه للتنظيف هو الفوران و هو لا يدوم كثيرا لذلك نقوم بوضع معلقة من الكربوناتو عند الاستخدام

طيب الخلطة دي بتعمل ايه ؟

الخلطة بتنظف كل شئ ايوة كل شئ

  • الاستانلس ستيل سواء في البوتجازات او الاواني
  • السيراميك
  • الشفاط و بتزيل الزيوت عنه بسهولة
  • التلاجة
  • الحنفيات
  • الصاج
  • المعالق و الاكواب
  • المرايات

طيب استخدمها ازاي بقي ؟

هنجيب طبق عميق

او ممكن حلة من المطبخ عادي هتلمع بعد ما تخلصي

و نحط فيها كميه الصابون السائل

و نحط عليه نص المقدار خل ابيض

و نحط تلات او اربع معالق ملح ليمون

و نقلبهم كويس بمعلقه

و اخر حاجه بنحطها الكربوناتو بنفس مقادير ملح الليمون

اول ما نقلب هتلاقي فوران بلون الصابون و هتلاقي رائحة الصابون الجميله طالعه

خدي كميه من الرغوة بالمعلقه و حطيها علي اي حاجه عليها بقع و اتركيها نص ساعة و بعدين ادعكي بالسفنجه او السلك حسب قوة البقع

و شوفي النظافه و الريحه الحلوة و كمان التعقيم عشان الخل بيقتل الجراثيم

بعد ما تخلصي جزء جزء اشطفي عشان ما يلزق الصابون عليه

و خالي بالك البسي جوانتي وانتي بتعملي بالخلطه لانها بتقشر اليدين بسرعه

طيب جربتيها في ايه عندك ؟

استعملتها علي البوتجاز كله من بره و جوه .. بوتجازنا استانلس بقي مرايه كانه لسه جديد

و استعملتها علي التلاجه و الشفاط و السيراميك بتاع الحمام و المطبخ و اي حاجه استانلس او نحاس او مرايات

بتخلي اي حاجه تلمع مهما كان عليها من بقع سواء كانت زيوت او شحم او بقايا الصابون علي السيراميك و كله من غير دعك و روائح وحشه

و اذا كان فيه حاجه صعبه تطلع بسهوله ضيفي ماء مغلي علي الخليط قبل ما تحطي الكربوناتو و ادعكي المكان بسلك خشن بدل السفنجه

اتمني الخلطة تعجبكم