ازاي زعلي من ابني يبقى نقطة ضعفه وازاي اقرب اكتر من ابني

🍃إزاي لما أقول لابني انا هخاصمك، ينهار م العياط؟ وأما أحاول أعلمه حاجة يبقى فرحان مش قرفان؟ و أما ييجي وقت قعادنا سوا يبقى طاير م الفرحة؟ وإنه يتمنى انه يتزوج زوجة “زي ماما”؟ ويلجألي بعد ربنا في كل همومه و مشاكله وياخد برأيي؟ إزاي أخليه يحب بِرُّه بيا و يسعى له غيبا حتى وأنا مش شايفاه ومش قدامه؟ إزاي ابني يقول لي “بحب أتكلم معاكي أوي يا ماما”.

👈خلي بالك، كل حاجة هنا هتعمليها معاه، احتسبي فيها أجر إنك بتقدمي لعروسة المستقبل زوج صالح يقر العين والخاطر، وبتحوشي لنفسك دعوات من عروسة ابنك ليكي عشان علمتي ابنك الرحمة والخيرية مع أهل بيته وفن الحب والمودة والسكن..
نقط كتير تقدري بيها او ببعضها، انك تحسسي ابنك بالاهتمام و الثقة بالنفس والاحترام و الحب و الصداقة والرحمة و الامومة ….الخ، باختصار: المودة والسكن والقرب .. والحب.. <3
بعد الاستعانة بالله والدعاء:

  • 🐥لما يلجألك ف مشكلة تخصه اسمعيله باهتمام وتفاعل، مهما كانت تافهة.. وساعديه في حلها طبعا — .. سيبك من نظريات التربية الحديثة اللي تقولك سيبي ابنك يحل مشكلته لوحده عشان يعتمد على نفسه.. إحنا عندنا رحمة وأمومة فطرية ما ينفعش نحطها ف الفريزر عشان نكبر ولادنا قبل الأوان.. ياخد نصيبه من الرحمة والاحتواء والحنية الأول، ومفيش مانع كل ما يشتد عوده تلقنيه إزاي يبحث عن حل لمشاكله معتمدا على نفسه، لكن ما تعلميهوش أبدا إن عقله يغنيه عن مشورتك ووقفتك جنبه.. الأصل: إنك هنا دايما جنبه <3 #الحباحتواء
  • 🐥لما يقول آسف اقبليها.. بلاش إذلال.. دة لسة طفل بيتعلم ويتمرن.. مهما كررها وكرر نفس الخطأ: سامحي ووسعي صدرك لهفواته.. بلاش تيئسيه من عفوك وتقنطيه من رحمتك..
    “فاغفر لي = فغفر له”..
    كل ما يغلط إديله أمل إن “معلش إنت لسة بتتعلم و أنا عارفة إنك مش قصدك تكون وحش، وكلنا بنغلط وخير الخطائين التوابون، ركز انت بس على نفسك وشيطانك وإنك المرة الجاية تكون أقوى وأحسن، و ادعي لنفسك و ادعيلي معاك”.. <3 // تفاصيل أكتر في منشور “التربية بالاعتذار” في أول تعليق.. #الحبمغفرةوأملوصفحةجديدة
  • 🐥اوعوا تناموا متخاصمين و تروحي تبوسيه بعد ما ينام وهو مش حاسس وبس كدة :/ .. بوسوا بعض واتصالحوا قبل النوم حبيبتي مش بعد النوم.. خليه ينام في حفظ الله وأمانه مش ينام وقلبه مكسور.. بلاش يتعود على إن “عادي إن الحبايب يناموا متخاصمين”.. #الحبتصفيةأول_بأول
  • 🐥بلاش رفض وصد للعناق وانتي زعلانة منه أو وإنتي ملخومة في حاجة.. علميه إن الحضن مالوش وقت.. بالذات وقته هو = وإحنا زعلانين مع بعض… وعلميه إن دة السنة {…ادفع بالتي هي أحسن فإذا الذي بينك وبينه عداوة كأنه ولي حميم…}..


=تفاصيل أكتر في “التربية بالحضن حتى وقت الزعل”، تاني تعليق.

الحب حضن كبير-بدون_مواعيد

  • 🐥لما تلاقيه مزنوق في موقف بايخ بيتهاجم فيه أو ملبوخ، دافعي عنه، واذكري مزاياه للي بيهاجمه.. #الحبدفاعوحماية_وسند
  • 🐥تغافلي كتير كإنك مش شايفة العك بتاعه.. ولما تقفشيه ف حاجة غلط عرفيه ساعات إن إنتي كان ممكن تعملي كذا وكذا كعقاب، بس هتسامحيه المرادي عشان “بتحبيه” و”مش بتحبي تزعليه”.. مع بعض الحزم طبعا وإنه يفهم إن مش كل مرة كدة.. #الحب_تغافل
  • 🐥اديله مساحة خاصة بأحلامه الخاصة بيه هو، مش أحلامك إنتي. #الحب مش أنانية
  • 🐥فهميه إنك هتحبيه حتى لو ما طلعتيهوش نسخة منك.. المهم يبقى رجل صالح. #الحب_حرية
  • 🐥استحملي نكته السخيفة.. واكتبيهاله ف ورقة و شيليها للذكرى في برطمان الذكريات.. و اكتبي تحتها “عشان تعرف أنا استحملتك اد إيه يا ضنايا 💀” (صورة برطمان الذكريات في رابع تعليق) #الحب_تحمُّل
  • 🐥ماتعامليهوش كمواطن درجة تالتة ولا كمواطن مالوش عندك إلا الحقوق وواحد زائد واحد يساوي اتنين وكدة.. لأ عامليه كصديق عزيز حقيقي زي زوجك و أختك و صاحبتك.. عامليه كحد من حقه تخاطبي عقله و تقنعيه و تتحاوري معاه مش كله قفش واوامر وطاخ طيخ طوخ🔪🔫💣.. #الحبتحاوربينالعقول… عامليه كحد بتحبي تسمعي الرغي بتاعه والقعدة معاه #قدرطاقتك طبعاقلبيعندك 😀 .. #الحبتقدير
  • 🐥إديله أسرار خاصة بيه هو بس.. ولو حتى أسرار مفتعلة كدة وكدة.. وحبذا لو أخوه إللي قريب من سنه يطّلع عليها هو كمان، عشان يتعلم إنه ما يخبيش سر على أخوه وكمان بالمرة يعرف إنك مش بتفرقي بينهم في الثقة.. أنا بحب كدة وبحس إن التفريق بين الإخوات بيبدأ من هنا. #الحب_ثقة
  • 🐥ناديله بألقاب جميلة زي يا صاحبي و يا حبيبي و يا دراعي اليمين…الخ ، #الحبإعزازودلع
  • 🐥هزري معاه وضحكيه.. وزغزغيه كمان.. #الحب_زغازيغ😀
  • 🐥لما يتعور أو يقع ف أمر مؤلم، حسسيه بلهفة وقلق عليه كبير، حتى لو هو الغلطان بسبب طيشه، واعملي دة بتوازن بردو من غير ما تخليه طفل مايص ومفتقر للرجولة والخشونة –تعليم الرجولة والخشونة سواء بنت أو ولد على فكرة- طب ازاي؟ طبطبة و تخفيف آلام أولا وألف سلامة حبيبي و ترقيه وتحطي إيدك مكان الألم وتقولي ذكر الوجع…. ثم بعدها تعاتبيه وتعلميه غلطته.. واعملي دة حتى لو بسبب انه ما سمعش كلامك.. معلش انا عارفة اننا بنبقى هنموت و نفحهمهم .. بس نجاهد نفسنا اننا نأجل العتاب والدروس المستفادة بعد ما وجعه يروح .. “انت مجروح دلوقتي دة مش وقت عتاب” دي جملة عجبتني أوي في منشور قديم لأحد الأفاضل.. بس دة ما يمنعش ان احيانا ف ساعة الموقف تعاتبي.. كما حدث للمسلمين في موقعة أحد و ذهابهم بعدها لحمراء الأسد بحراحاتهم لترميم الخطأ.. #توازن.. لكن الأصل هو الرحمة واللين والرأفة.. هنفصل أكتر في منشور العيال والرجولة، خلال أيام إن شاء الله. #الحب_رحمة
  • 🐥لما يكون مركز ف حاجة إديله فرصته يخلصها و يجيلك، طالما ينفع ومانتيش مستعجلة.. لو ما ينفعش، هو هيتفهم البر والأولوية والطواريء، طالما علاقتكم ببعض قوية وبناءها هرمي #متوازن مبنية عالتفاهم والاحترام والحب، ولو قصر في تلبية ندائك بسبب تركيزه في حاجة بقوة، اعذريه ونبهيه ما يكررهاش تاني وخلاص، مش لازم تحطمي أعصابه و تورثيه توتر دائم عند ندائك عليه، كلنا بننفصل عن العالم الخارجي وإحنا مركزين.. #الحبرفقومعذرة
  • 🐥لو ف مرة كان عاوز يشرب مية مثلا = هاتيله إنتي.. مرة كدة.. و قوليله “هجيبلك انا المرادي يا حبيبي ما انت ياما سقتني وأنا بحب أدلعك”، و ادعيله دعوة حلوة.. #الحبامتنانومقابلةالإحسانبإحسان ..
  • 🐥ألف باء تربية علموهالنا: دايما لو هتنقدي = انقدي فعله وبلاش تذمي فيه هو شخصيًا.. / مثلا: “أسلوبك وحش” مش “إنت وحش”.. /
    وطبعا لو تقدري تقولي “فيه أسلوب أحسن من كدة” = هيبقى أفضل أحيانا، حسب الموقف طبعا… لكن عمومًا، الأصل عندك يكون في التعامل اللفظي معاه: “وقولوا للناس حُسنًا”👌

الحب كلمة طيبة…

  • 🐥-ألف باء تربية علموهالنا بردو: لما يغلط = ماتجيش ناحية مساحات الود والحب والذكريات الحلوة اللي بينكم… مثلا تقولي: “مش (بحب) لما بتعمل كدة” مش “مش (بحبك) لما بتعمل كدة”.. ولا بسبب غيظك منه تقومي تتريقي على أي ذِكرى حلوة كانت بينكم أو هدية جابهالك قُريب أو زمان.. — ناهيكي عن إن دة هيكون بداية تعلمه لكفران العشير = كمان هيكون فيه كسر خاطر واستهانة بالعواطف والمشاعر، وتبرير لسحقها عند كل زعل.. الحب حاجة والزعل حاجة تانية..

الحب_أمان

  • 🐥بلاش تِمني عليه بنعمتك وودك معاه.. هيكره الدراع اللي بتلويه منها.. وممكن يقطعها عشان يحس إنه حر مش عبد.. #الحب تواضع وبذل لله بدون_مَنّ
  • 🐥لما يقول على نفسه وِحِش وإنه بيزعلك كتير و نفسه يبقى بار بيكي بس فاشل = قوليله إنت أصلا زي الفل وأنا راضية عنك -سامحني يا رب 😑-، وناقصك بس كام حاجة كدة عشان تبقى من إللي النبي ﷺ قال عنهم “كَمُل من الرجال كثير”.. / حتى لو بتبالغي= دة اسمه تحميس وتحفيز للخير بالإيحاء النفسي- وإنت كل يوم بتتحسن يا حبيبي، ما تبطلش دعاء لنفسك إنت بس، أنا عشان عاوزاك حد مختلف فبدقق معاك كدة عشان تبقى إنت وإخواتك أئمة للمتقين و سند للأمة… #الحب_تشجيع
  • 🐥لما يدخل البيت، استقبليه استقبال مُبهج وَدُود بدون افتعال.. النبي ﷺ كان بيقوم لفاطمة ويمسك إيديها ويقبّلها ويوسع لها تقعد مكانه <3 … وامسحي على شعره من وقت للتاني مع ابتسامة حنينة.. ومثلا أما يصحوا من النوم اضحكي ف وشهم وقولي “أهلا أهلا حبايب قلب ماما”.. / هتحتاجي قفص لمون أنا عارفة😁، بس معلش احتسبي يا فوزية✋😁. #الحبلهفةوحنية
  • 🐥ادعيله أحيانا بصوت مسموع وفي وشه، كل ما يعمل لك حاجة بترضي ربنا أو بترضيكي.. أو في نهاية كل جملة يقولها وبتردي عليه فيها…إلخ، يعني بمناسبة ومن غير مناسبة.. خلي دايما دعواتك الطيبة له بترن في ودانه كأسلوب حياة.. هيتعلم يطيب لسانه مع الآخرين.. وياسلام لو تحطي إيدك على قلبه وإنتي بتدعيله = دي سنة مهجورة <3 .. #الحبدعاء .. واوعي تدعي عليه😠👊.. #الحبمش_انتقام .. “الدعاء لـ/على ابنك” في تالت تعليق..
  • 🐥اعزمي أصحابه في البيت واتفشخري بيه قدامهم وأكرمي ضيافتهم لأجل عيونه.. وقدام صحابه وصحابكم وأهلكم كلكم، حسسيه انه صاحبك.. خد يا صاحبي.. هات يا صاحبي.. #الحبافتخارومدح
  • 🐥اعرفي لونه المفضل وهوايته المفضلة واكتر واحد صاحبه في المدرسة واكتر معلمة بيحبها ونفسه يطلع ايه لما يكبر وأكلته المفضلة وكرتونه المفضل.. اتعلمي متطلبات كل مرحلة عمرية بيمر بيها وخصائصها ورغباتها.. دي اهتمامات بسيطة صعب أوي أي أم نفسها ابنها يقرب منها ما تكونش عارفاها. (إن شاء الله نختصرهم في مقالات لاحقة) .. #الحب_اهتمام
  • 🐥وطبعا اعرفي لعبته المفضلة واحترمي شغفه بيها، وهوايته المفضلة ونميها له.. #الحب إشباع ، والعبيها معاه حتى لو كورة وإنتي بتكرهي الكورة ولو حتى ماتش كورة خفيف.. #الحب تضحية 😀 ، وفهميه إنك مش بتحبيها لكن عشان عاوزاه يفرح بتلعبي.. #الحب بيعمل المعجزات 😀 .. العبي معاهم وارجعي طفلة من تاني، في البيت بس طبعا — .. العبي واضحكي وانزلي لمستواهم بدون قلة احترام وبدون عنجهية بردو.. #الحب انباسط ..
  • 🐥سخري بيتكم لراحة ولادك وفرحتهم.. عندنا مثلا الصالة واسعة نوعا ما، لكن العفش مضيقها، معظم الوقت طالما مفيش ضيوف بنبقى حاشرين العفش على الجنب، وعاملينها ملعب كورة 😀 .. كمان ترابيزة السفرة تقريبا مش بنشيل شبكة البينج بونج من عليها.. #الحب إنفاق مما_نحب
  • 🐥اوعي تفضحيه قدام أي حد.. سواء غِلط أو ما غلطش.. غِلط— يعني عمل مشكلة.. ما غلطش—يعني مجرد موقف يكسف ومضحك أو سر معين قالهولك وهيزعل لو حد عرفه.. احترمي كرامته وسِتره وخصوصيته.. علميه إنك صندوق أسراره الأمين. #الحب احترام وستر
  • 🐥اسأليه عن أحلامه وخواطره وبيفكر ف إيه ورأيه إيه ف أمور الدنيا المختلفة.. رغي ف رغي وخلاص = يحس من خلاله إنه مهم عندك وإن الحوار معاه غاية سعيدة عندك.. مش حاجة بتهربي منها وحمل تقيل على قلبك.. #الحب حوار وألفة
  • 🐥لو كلكم بتتكلموا في حوار جماعي أو قعدة جماعية مثلا إدوله دور يتكلم و محدش يقاطعه..ما تتعاملوش معاه على إنه كمالة عدد أو طيشة مالوش وزن.. #الحب توقير وإنصاف
  • 🐥لماياخد بإيدك عشان عاوز يوريكي حاجة معينة وعنيه بتلمع كدة🤩، روحي معاه واعملي رد فعل سعيد لإنه نفسه يشوفك فرحانة منه، النبي ﷺ كانت الجارية تاخذ إيده وتقوده مطرح ما كانت عاوزة، وكان بيطاوعها مطرح ما توديه.. #الحب جبرخواطر
  • 🐥لما تغلطي في حقه تربويا أو تظلميه أو تسرفي في عقابه والغضب منه أو… إلخ، امسحي أول بأول.. بوسة-حضن-تشجيع-دعوة حلوة-حوار اعترافات وقورة مفيهاش الابتذال الغربي …الخ، #الحب مصارحة وصدق_واعتذار
  • 🐥اعملوا مقرأة سوا كل واحد يقرا ولو صفحة.. أو اشتركي معاه ف ورده القرآني أو ورد الأذكار، في أوقات لطيفة كدة تجمعكم سوا.. خصصيله وقت مخصوص ليه لوحده تقعدوا فيه سوا في هدوء تشربوا شاي وتخططوا و تتفقوا و تحلموا وتضحكوا و تتصاحبوا….الخ، وليكن مثلا بعد الفجر ولو ربع ساعة، أو بعد العصر أو قبل المغرب.. دة في حالة إنه أكبر إخواته مثلا وبدأ يعقل أمور كتير وبتقوميه معاكي يصلي الفجر.. ادعوا مع بعض مرة وهو يقول آمين وراكي، ومرة هو يدعي وإنتي تؤمني.. لتكن مثلا يوم الجمعة في ساعة الإجابة المتواترة، بعد العصر للمغرب.. وصلوا جماعة مع بعض لما الصلاة ف المسجد تكون متعذرة.. #الحب في الله أوثق عُرى_الإيمان
  • 🐥احكيله قصة قبل النوم، أو وسط اليوم حتى، من قصص صغار الصحابة أو القرآن أو السيرة أو قصص الحِكَم عموما.. واعملي أصوات وإخراج سينمائي بصوتك.. #الحب_إمتاع
  • 🐥وهما بيخشوا سرايرهم غطيهم واحضنيهم وبوسيهم وارقيهم بآية الكرسي ، أو حتى خليهم يقولوها هما، وقوليلهم عشان ربنا يبعت لكم ملك يحفظكم للصبح.. وارقيهم وهما خارجين من البيت ولو بالرقية السريعة حتى بتاعة سيدنا ابراهيم لاسماعيل اللي كان بيرقي بيها النبي صلى الله عليه وسلم الحسن والحسين: “أعيذك بكلمات الله االتامة، من كل شيطانٍ وهامة، ومن كل عينٍ لامة” .. #الحب خوف وإشفاق ..
  • 🐥حطيله مفاجآت في محفظته.. قلب مكتوب عليه “حموزي حبيبي” مثلا، شوكولاتاية مثلا ملزوق عليها “لومة حبيب قلبي” مثلا… ابعتيله رسالة على الموبايل يوم امتحانه “ربنا معاك يا حبيبي”..
  • = منها بيتعلم الحب والاهتمام، ومنها بتكسبي مكانة ف قلبه كالجبال الرواسي.. حسسيه إن سعادته غاية عندك وهدف بتخططيله… #الحب إبهار ومفاجآت
  • 🐥اوعي تخلي أي أمر دنيوي -مش ديني- يبوظ علاقتكم ببعض، بالذاااات المذاكرة.. اتكلمنا عن دة بالتفصيل في #العيال والمذاكرة.. #الحب أولويات وأسس ومباديء
  • 🐥 كل ما تقع تحت ايدك مثلا صورة او نكتة او فيديو معين انتي عارفة ان ابنك بيحبه، شيليه على جنب وفرجيهوله وقوليه انك شايلاهوله مخصوص عشان بيحبه ❤❤… مثلا فيديو جون أسطوري لو هو مهتم بالكورة، او فيديو الكوارث الطبيعية لو هو عاطفي بزيادة 😂😂، او صور نكت عفيفة مافيهاش ابتذال لو هو مغرم بالنكت. #الحب_إسعاد

باختصاااااااار: حبوا ولادكم.. وعبروا عن دة بصدق ❤❤❤

🌱🌱🌱حبيبتي الحياة قصيرة.. والولاد بيكبروا بسرعة، وقوة طردهم بعيد عنا أقوى من قوة جذبنا ليهم.. فلازم تركزي..
🌱🌱🌱هتقوليلي أنا لوحدي وزوجي كذا وكذا وعامل لي إحباط ومش بيساعدني؟ هاقولك ابدئي صفحة جديدة مفيهاش تمحور حوالين الزوج، ياما أمهات نجحوا لوحدهم، بل ياما أمهات نجحوا في وقت الأب كان عامل هدم شرس كمان.. خليكي أم ذكية: تستغل البيئة السيئة المفروضة على ابنها، في تربيته على الاستقامة وتنفيره من الفساد دة.. واقري القصة اللي في سادس تعليق…

إلى اللقاء مع باقي السلسة: العيال والتشاحن، العيال والرجولة، العيال وبدئل الضرب، العيال وأوقات الفراغ.. إن شاء الله ..