أية اللى يخلى انسان مش سعيد لدرجة انه يفقد الاستمتاع بالحياة ؟ ؟ ؟

الإجابة على السؤال دا كلها مستوحاه من خبرات حقيقية ، و دا بيأكد اننا كمعالجين نفسيين بنتعلم زى كل الناس من وجعنا او معايشتنا لوجع الناس لكن ماعندناش شنطة حلول مبتكرة و لا بلورة سحرية و بابنا مخلع زى باب النجار عادى لاننا بنى ادميين مش الهه .

1- الفهم :
لفترة قريبة كنت فاكرة أننا لما نفهم زيادة عن اللزوم دا سبب لوحدتنا و أكتئابنا لكن مع الوقت عرفت أن الفهم غير المُكتمل هو السبب الرئيسى لوحدتنا و عدم قدرتنا على الاستمتاع بالحياة .
و عشان كدة محتاجين قبل ما نقول اننا وصلنا لمرحلة الفهم ( فهم الحياة ) نتأكد ان الفهم مش one way يعنى نكون متأكدين اننا بنشتغل على فهم انفسنا زى ما تاعبين نفسنا فى فهم الناس و و تفسير افعالهم .

فهم نفسك لو قابله فهمك للناس هيساعدك تعمل 4 حاجات مهمين :
هتقدر نفسك بجد و تديها حقها .
هتقدر تُعذر الناس على أفعالهم .
هتتعلم ماتديش الناس فى حياتك أكبر من حجمهم الحقيقى
غير أن فهمك للعلاقات و للمواقف هيختلف و هيبقى اكتر نضج و الحياة هتبقى اسهل شوية .

2 – الإنجاز :
كتير مننا اتربى على الإنجاز ، اتربى أنه يكون مُنجز
خلص المدرسة عشان تدخل الجامعة خلص الجامعة عشان تشتغل ، اشتغل عشان تتجوز ، اتجوز عشان تخلف …… الخ و عمرنا بيجرى و احنا كمان بنجرى بنجرى ليه ؟ بنجرى من اية ؟ محدش عارف ، كل اللى عارفينه ان مارثون الحياة ابتدى و الكل طلع يجرى .

3- هترتاح لما تخلص
كتير مننا اتربى على انه هيرتاح و يتبسط بعد الإنجاز بعد النجاح لكن قليل اللى اتربى على الاستمتاع بالرحلة او الاستمتاع باللى بيعمله . رغم ان المتعة كلها بتبقى وقت الرحلة مش بعد ما نوصل .

4 – اننا بننسى و بننتمى لأماكن و اشخاص .
حلو الانتماء و بيحسسنا بالأمان لكن مهم انت بتنتمى لأيه ؟ و لية ؟ و الأهم فى الأول انك تنتمى لنفسك و لهدفك لان الاماكن و الاشخاص مش دايمين لكن انت و هدفك ملزمين بعض لأخر يوم فى حياتك .

5- نوعية الناس اللى حواليك :
بيقولوا جنة من غير ناس ماتنداس ، لكن مين الناس دى و تأثيرهم علينا ايه دا السؤال اللى لازم نفكر فيه ؟ ! و عشان كدة اتخلص من الناس اللى تأثيرهم سلبى ، و لو هما قريبين منك قوى يعنى ماينفعش تتخلص منهم يبقى الحل انك تتجنب على قد ما تقدر انك تتكلم معاهم عن احلامك و امالك لانهم هيكرهوك فى عيشتك و عيشة اللى خلفوك مش لانهم بيكرهوك و لكن لانهم للأسف دايماً شايفين الدنيا سودا و ان الطريق مسدوداً مسدوداً يا ولدى .

6- الأكل :
طول عمرى ماليش فى الأكل لكن مع الوقت اكتشفت أن طريقة اكلنا بتأثر على صحتنا و مزجنا و عشان كدة انت هتحتاج تقعد مع نفسك كدة و تعمل اعادة هيكله لنظامك الغذائى و كميات المية اللى بتشربها و حاجات كثير محتاجة اخصائى تغذية .

7 – العادة المفقودة :
الرياضة مهمة حتى لو هتتمشى شوية و انت رايح الشغل و بدل ما تتمشى و انت بتفكر فى همومك او حد مضايقك ، ، امشى و ركز فى المشية ركز فى حركة رجلك عضلاتك بتتحرك اذى يعنى أسمع جسمك بيقولك اية ؟! و كل ما المشاكل او احداث الحياة تدور فى دماغك ركز اكتر فى مشيتك و حركة رجلك و الطريقة اللى بتتنفس بيه ، الموضوع ممكن يأخد وقت عشان تتعلم تفصل لكن مع التدريب هيبقى المشى فرصه للتخلص من ضغط الحياة .

7- الروحانيات :
الروحانيات تأثيرها مهم فى احساسنا بالسعادة و الرضا من عدمه عشان كدة اسمع القرأن او الانجيل حسب دينتك ايه ، او اسمع الموسيقى هتلاقى رسايل بتوصلك بتدلك على احساس تايه منك و ساعات هتدلك على الطريق .

و أخيرا ؛ خليك دايماً فاكر ان ربنا جانبك و على اد ثقتك فيه و ايمانك بنفسك و اهدافك هتقدر تحقق المستحيل .