التفكر في النعم علاج للإكتئاب

قابلت اللي كل امنيتها انها تدخل الحمام تقضي حاجتها بمفردها
لانها محرجة من اللي بيسندها انه يشم الروايح دي

وقابلت اللي كل امنية حياتها بردو انها تستر نفسها و تستنجي بنفسها

وقابلت اللي عنده ضمور عضلات وخلاص رجليه مابقتش شايلاه
وعاوز بس لو حاجة توقف التدهور

وقابلت اللي لما تعوز مصلحة ضرورية بتنادي من الشباك علي ٤ من اصحاب المحلات اللي تحتها يطلعوا لها بكرسي ينزلوها
ويركبوها تاكسي
ولما تنزل عند مصلحتها بتطلب من المارة يدبروا كرسي ويشيلوها يطلعوها لمصلحتها
عشان ضمور العضلات بردو

وقابلت اللي امها فقدت عقلها بعد ماخلفت ١٠ عيال
٥ مبصرين و٥ مكفوفين
وعلي فكرة الام والاب مش اقارب

وقابلت ام ل٧ أطفال منهم ٤ معوقين ذهنيا وحركيا
ولما سألتها 
انتي وابوهم قرايب
قالت لي
لا مش قرايب
ده حتي ابن خالتي

وقابلت اللي عيالها واحد ورا التاني بيفقد النظر تدريجيا ادام عينيها وقلبها المحسور
وقالوا لها رغم انها وزوجها مش اقارب الا ان مفيش توافق بين جيناتهم وغالبا عيالهم كلها هتبقي كده فمتخلفوش تاني

قابلت اللي ٢ من عيالها بعد ما يدخلوا ابتدائي المخيخ ضمر تدريجيا وفقدوا القدرة علي الحركة
بعد ما كانوا قالبين الدنيا 
وكمان فقدوا القدرة علي الكلام

قابلت اللي خلفت ولد سليم وبعد كده سقطت ١٥ مرة
والولد وقع علي راسه جاله شلل رباعي
وبقي طول بعرض شقيانة فشيله وحطه

قابلت اللي ابنها عنده نقص في انزيم
مجرد انزيم
مركب كيميائي واحد
خلي عملية الهضم والتمثيل الغذائي مضطربة
واحال حياتهم لجحيم من الالم والمرض والبكا والسهر

قابلت اللي قضت في المستشفيات اكتر ما قضت في بيتها

من وعيت علي الدنيا ٤١ سنة اهه شفت كتيييييييير

بحيث كل ماحس ان الدنيا اسودت
وخلاص ضاقت واتخنقت
وبديت افكر في جدوي الاشياء
وان مفيش فايدة
وان الحل نموت عشان نرتاح

اتذكر دول وغيرهم

واستشعر ان اد ايه بتقلب في الاف النعم 
وعمالة ابكي علي نعمة مفقودة
بحساباتنا البشرية القاصرة
لكن لو اطلعت علي الغيب هلاقي ان ده خيري

افوق نفسي
واقعد احرك في صوابعي اللي هي نعمة مش في عظم نعمة السمع والبصر
وان كان كل نعمة نعجز عن شكرها مهما صغرت 
واتأمل نعمة الله دي واقلب نظري حواليا اعد في النعم لحد ما تعب من العد

استغفر
وكلي حسن ظن
ان الله سيقبل مني
ويعفو عني
التفكر في النعم علاج للإكتئاب
واسألوا الله الرضا

بقلم د شيماء مشرف