تعرفي على اهمية الكالسيوم وفيتامين د لطفلك


الكالسيوم عنصر هام فى نمو عظام الطفل …. فيتامين د بيساعد على امتصاص الكالسيوم ….

أوقات بتلخبط الأم مابين الاتنين

الكالسيوم:

الرضع:

بيحصل الرضيع على احتياجه من الكالسيوم سواء من الرضاعه الطبيعيه أو اللبن الصناعى ( يعنى مش عمال على بطال نقول العيل ده محتاج كالسيوم )

٦ شهور ٢٠٠ مجم/ اليوم
٦- ١١ شهر ٢٦٠ مجم / اليوم

الأطفال:

١- ٣ سنوات ٧٠٠ مجم / اليوم
٤-٨ سنوات ١٠٠٠ مجم / اليوم

ولو الطفل بياكل أكل صحى عادى … يعنى فيه لبن … زبادى … جبن …. برتقال ….خضروات ورقية …. الأكل ده غالبا بيبقى كافى يمده باحتياجه من الكالسيوم

الأطفال قبل سن المراهقة والمراهقين:

٩- ١٨ سنه ١٣٠٠مجم / اليوم

الجماعه دول بقى اللى المفروض ناخد بالنا شويه ان احنا نركز على تقديم أكل غنى بالكالسيوم بزياده شويه …

الأغذية الغنية بالكالسيوم

اللبن – الزبادى – الجبن -الكرنب – الخضروات الورقية – البروكلى – الفول الأخضر – الفاصوليا البيضاء – الحمص – البرتقال – التين – الكمثرى – السمسم

أفكار لتقديم أطعمه غنية بالكالسيوم يقبلها الأطفال والمراهقين:

ميلك شيك : لبن مضروب مع فواكه طازجه مثل الفراوله

زبادى بالفواكه والشوفان

○معجنات مضاف اليها السمسم (يعنى قرص بالسمسم مثلا ?? )

○ نزود حمص على الكشرى المصرى

فول أخضر ( متوافر الأيام دى) ونخليه كوجبه خفيفه

سلطه خضراء بالجرجير والفاصوليا البيضاء

شوربة بروكلى باللبن

جبنه قريش عليها خضروات مقطعه مثل الفلفل الالوان والليمون والزعتر

فيتامين د:

ده بقى الفيتامين اللى ببزود امتصاص الكالسيوم …. ولكن لاتوجد اطعمه كثيره يتقبلها الأطفال غنية به ( الأسماك …صفار البيض … زيت كبد الحوت)

علشان كده أوصت الجمعية الأمريكية باعطاءه فى صورة أدوية للاطفال منذ اليوم الأول من الميلاد

أقل من سنه ٤٠٠ وحده دوليه يوميا

أكثر من سنه ٦٠٠ وحده دوليه يوميا

▪ الطفل اللى بيرضع صناعى تقريبا لتر يوميا مش محتاج ادوية بها فيتامين د

▪ فيتامين د ممكن يتاخد لوحده زى ( الفى دروب ) حبيب الكل … أو فى صوره أدوية بها فيتامينات متعدده

▪ طبعا ماننساش أهمية التعرض للشمس

يبقى احنا كده قدرنا نعرف الفرق بين الكالسيوم وفيتامين (د) … يعنى مش اى طفل لسه عنده ٦ شهور وما سننش او ماقعدش نقول ده نقص كالسيوم وندى كالسيوم من غير داعى ..

رجــــــاء : رجاءا من كل الأخوات الكريمات اللاتي استفدن من هذه المعلومات وبقليل من الجهد مشاركة الموضوع عبر احدى ازرار المشاركة بالاسفل ولكن جزيل الشكر.