عشان ارتفاع الأسعار .. جبتلكم وصفات كتير هتوفر معاكم جدا


  1. الكفتة اعمليها بالبرغل هيمتص المية و هيحافظ علي حجم الكفتة وممكن تعمليها بلحمة جملي وحتة لية وهتبقي حلوة بردوا
  2. الجلاش ممكن نستبدل اللحمة بكبد وقوانص مقطعة صغير وتعصجيها مثل اللحمة. وممكن لو بتستخدمي مكعبات المرقة تحطي عليها مرقة اللحم هيبقي طعمها زي اللحمة بالظبط
  3. اللحمة المعصجة كتري البصل في التعسيج مش هيغير الطعم وهتكتري الكمية
  4. اعملي شيش طاووق هيبقي تنويع والخضار ( بصل. فلفل) هيكتر الكمية حتي لو كمية صغيرة
  5. اعملي الفراخ شاورما هتكتري الكمية بالخضار واعمليها فتة شاورما هتبقي حلوة وموفرة ووجبة متكاملة ( ارز. وعيش. وبروتين. وخضار)
  6. زودي البصل في الحواوشي. هيبقي طعمه حلو وهتكتري كمية اللحمة وعدد الأرغفة
  7. البانيه بيتعمل به حاجات كتير. بانيه. شاورما.كوردن بلو
  8. البانيه والبفتيك قطعة اللحم بيزيد حجم القطعة بالبيض والبقسماط فممكن تكتري منه
  9. احيانا قطعة البفتيك بتبقي كبيرة اقسميها علي اتنين. بدل الفرد مايأخذ قطعة يأخذ قطعتين
  10. كل مايفيض ارز ابقي احفظيه في الفريزر الي ان يعملوا اكلة طلعيه وعلي البوتجاز بشوية مية وحتة سمنة او وانتي بتحفظي اللحمة وتقسميها جزء للسلق والتحمير ابقي قطعي جزء قطع صغيرة واعمليها كباب حلة بدل المية شوية شوربة. واعمليلوا اعادة تدوير
  11. خزني الفراولة في الفريزر وفي رمضان اعملي مهلبية فراولة بدل القمر الدين
  12. ابقي اعملي كل شهر كفتة ارز علشان كيلو اللحمة مع الارز والخضرة بيعمل حوالي اتنين كيلو
  13. لما تعملي لحمة البانيه ابقي شيلي حطتين علي جنب تيجي اخر الشهر يعملوا اكلة اواكلتين وممكن يتهروا علي بيتزا. او فطيرة شرقي او حلوة جلاش
  14. ابقي شيلي حتة من اللحمة المفرومة هتنفع تحطيها في طواجن او حشوة للبيتزا والجلاش او علي مكرونة
  15. لما تجيبي الفراخ ابقي جمعي الكبدة والقوانص في كيس هيعملوا اكلة
  16. المكرونة ممكن التنويع فيها مكرونة باللحمة. او مكرونة بالفراخ. مكرونة بالبسطرمة
  17. لما تعملي لحمة او فراخ ابقي احفظي الشوربة في الفريزر لأي يوم عايزة تعملي ارز اصفر او محشي وممكن تعملي معاه كفتة او بانيه. او لو احتاجت تطبخي في يوم من غير بروتين
  18. لما تكون الطماطم رخيصة ابقي اشتريها وصلصليها واحفظيه في الفريزر
  19. وانتي بتعملي البشاميل لو عايزة تقللي كمية اللبن ممكن تزودي علي اللبن شوربة وبردوا هتبقي حلوة
  20. كل مايفيض منك اكل ابقي احفظيه في الفريزر وفي الأخر ابقي طلعيه واعملي بهم اكلة
  21. العيش الفينو اللي يفيض ابقي حمصيه واطحنيه في المرحلة وحطي عليه اي بهارات تحبيها وهيتبقي عندك احلي بقسماط
  22. احفظي العيش في الفريزر وطلعي علي حسب احتياجك. علشان ميبقاش في فائض في العيش
  23. ابقي قسم رغيف ارباع علشان الأطفال ومايفيضش عيش كتير ويرمي
  24. لو عندك عيش كتير بيفيض ابقي جمعيه وحمصيه في الفرن واعملي به الفتة
  25. لارتفاع سعر الطماطم ابقي جيبي فلفل رومي احمر بلدي ونضربه في الخلاط مع توم وخل وممكن شوية زيت وملح واحفظيه في الفريزر كل ماتعملي طبيخ ابقي خدي معلقة وممكن تسلقي واحدة بنجر وتضيفيها للطماطم هتحمر الطماطم
رجــــــاء : رجاءا من كل الأخوات الكريمات اللاتي استفدن من هذه المعلومات وبقليل من الجهد مشاركة الموضوع عبر احدى ازرار المشاركة بالاسفل ولكن جزيل الشكر.