تعرفي على حساسية اللبن عند الاطفال

? طفل رضيع بريء جميل عنده مشكلة ، خدوده الجميلة دي ملتهبة جدا atopic dermatitis
?لا مش حسد
?ده منظر مميز جدا لحساسية طعام خصوصا #حساسية_اللبن
…
?هو اللبن ممكن يعمل حساسية ؟؟؟
?ده أشهر حاجة ممكن تعمل حساسية طعام في الأطفال و تهيج الجسم هي اللبن
..
?يعني اللبن أخطر من الموز و الفراولة ؟
?عند الأطفال اللي بيعانوا من الحساسية اللبن نمبر وان بين كل الأطعمة اللي بيعمل تحسس شديد ،و أخطر من الفراولة و الموز و المانجة و من الأستاذ غسان مطر نفسه
…

?طيب يا دكتورة ايه أسباب حساسية اللبن دي
?ليها اسباب كتير متراكبة منها قابلية الطفل للحساسية و تعرضه المبكر للبن

يعني مثلا حماتك شايفة لبنك خفيف قالت لك رضعي طفلك رضعة صناعي تسنده ، اللبن الصناعي هو لبن بقري معدل و وارد جدا يهيج مناعة الطفل ضده

أو مامتك شايفة إنه طفلك وزنه قليل عايز لبن بخيره بقى من إنتاج مزارعنا فيهيج جلد الطفل بالشكل ده

أو مفيش سبب واضح قدامنا
…
?أعراضها ايه طيب حساسية اللبن دي ؟
?طفح جلدي زي اللي في الصورة كده
?بكاء مستمر بدون سبب واضح
?وحود دم في البراز _مش لازم في كل الحالات
?أعراض حساسية أخرى زي تزييقة في الصدر أو صعوبة في التنفس
…

?ايه اللي يخليني أحلف إنها حساسية لبن
?إنك تمنعي كل منتجات اللبن عن طفلك بعد الرجوع لطبيبك طبعا ، و تلاقي طفلك اتحسن من المنع
كلها ، شاملة اللبن و الرز بلبن و المهلبية و الكيك المعمول بلبن و العيش المخبوز بلبن و السمنه البلدي و القشطة و لستة طويلة من الأطعمة اللي داخل فيها لبن
?و لو بترضعي طبيعي للأسف مضطرة انتي كمان تمنعي عن نفسك كل ده
…
?طيب مالهاش علاج يعني ؟
?المنع هو العلاج ..مش إلى مالا نهاية ،
بعد فترة حسب رؤية الطبيب بيدخل اللبن بالتدريج في غذاء طفلك و نشوف الاستجابة و أوقات كتير بيستجيب و تختفي أعراض الحساسية اللي كانت ظهرت قبل كده
…