تعرفي علي أنواع الكحة لدى الاطفال وكيفية التعامل معاها
?الكحه☠ ..
وما أدراك ما الكحه
? من أكتر الاعراض اللي بنشوفها في الاطفال وبتكون مصدر قلق للاهل والطفل والطبيب طبعا .
?حابب اذكر هنا بسرعه اهم واشهر واخطر اسباب الكحه وازاي نتعامل معاها لحد ما نوصل للطبيب ويكشف ع الطفل ويحدد نوع وسبب وعلاج الكحه لان الموضوع مش دواء كحه وخلاص.
? اذن مبدأيا كده كل نوع كحه له علاج وله تطور لازم نفهمه عشان منستعجلش التحسن وعشان بردو ميكونش الطفل بيسوء واحنا منتظرينه يتحسن.
? مش هتكلم في الموضوع باسلوب علمي اوي لانه هيكون مكلكع شويه فياريت زمايلنا الاطباء المتابعين للصفحه يعذرونا لكن الكلام هيكون اغلبه بطريقه الاعراض والعلامات اللي الاهل والطبيب هيلاحظوها ومنها يعرفوا الكحه دي ايه وعلاجها ايه .
كحة نزلة البرد العادية:
ودي بتبدأ بالرشح والعطس ثم كحه ناشفه وبعدين تقلب ببلغم وبتتحسن بالسوايل الدافيه ومهدئات السعال وادية الكحه العشبيه وخلال اسبوع تنتهي ان شاء الله .
كحة حنجرة:
.. ودي كحه ناشفه ذات صوت مميز ( صوت زنه في مع بحة ملحوظه في الكحه وفي الصوت) ودي تستدعي استنشاق بخار ماء دافئ فورا في البيت ولو امكن اضافة استنشاق اسمه فابوزول مع النزول سريعا للمستشفي لعمل جلسات استنشاق اكسجين بادويه معينه معروفه للاطباء .. المهم هنا هو البعد عن موسعات الشعب الهوائيه في بداية العلاج ).
كحة حساسية الصدر:
.. ودي يميزها ان الطفل بيجيله اعراض تنفسيه بشكل متكرر زي كحه وتزيقه بالصدر وصعوبه بالتنفس واحساس بضيق في الصدر والاعراض دي ممكن تظهر في اي وقت او مع المجهود او بعد تعاطي ادويه معينه او تزيد بالليل او تظهر مع ادوار البرد والنزلات الشعبيه او بعد استنشاق روايح معينه او اتربه او ادخنه .. ولها تقسيمه معروفه للأطباء تحدد شدتها والعلاج المناسب (GINA guidelines) وجدير بالذكر هنا ان افضل واهم علاج بعد البعد عن المسببات الخارجيه هو جلسات البخار المستنشقه بجهاز النبروليزر ( مهم جدا يكون في البيت لاي طفل اتشخص ان عنده حساسية صدر) وكذلك العلاج بالبخاخات المستنشقه باشكالها المختلفه وبلاش الكلام ان الطفل هيتعود عليها وانه او اخدها هيعيش طول عمره كده ( دي محتواها موسع شعب ومضاد التهاب مش مخدرات حضرتك?) لكن بتحمي طفلك من الاثار الحانبيه لادويه الشراب لانه هيحتاج يمشي عليها فترات طويله والحل الامثل من ناحية الامان والفعاليه هو البخاخات والجلسات. وجود تاريخ مرضي في الاسره او في الطفل نفسه للحساسيه من اي نوع ( صدر عين انف جلد ) مهم جدا في التشخيص .. التحاليل والاشعات ليست ذات قيمه عاليه في التشخيص لكنها تفيد اما اختبار وظائف التنفس مهم جدا في التشخيص والمتابعه.( طولت في الحساسية لاهميتها لكن ده كدا مختصر اوي والموضوع محتاج متابعه مع طبيب اطفال مهتم بامراض الصدر او طبيب صدر اطفال متخصص)
كحة ارتجاع المرئ:
ودي بنلاحظها اكتر في الاطفال الصغيرين وبتزبد بالليل اثناء النوم نتيجة ارتجاع حمض المعده وافرازات المعده الي الجهاز التنفسي وعلاجها الاساسي علاج الارتجاع.
كحة استنشاق جسم غريب:
ودي بنشك فيها لو طفل سليم تماما لكنه عنده كحه طولت ومش ظاهر لها سبب وبستدعي لتشخيصها عمل اشعات ع الصدر ومنظار رئه .
كحة الالتهابات الشعيبية والشعبية والرئوية:
. ودي بتكون ناتجه عن عدوى تنفسيه باحد المكروبات المسببه لامراض الجهاز التنفسي ويجب عرض الطفل بسرعه علي طبيب الاطفال لتحديد العلاج المناسب وهل هيكون في البيت اوالمستشفي وينبغي التحرك بسرعه خاصة لو كان سن الطفل صغير في اول سنه من عمره لان الحاله ممكن تسوء بسرعه .. بعض العلامات الخطره اللي تقول ان الحاله بتسوء تشمل زيادة سرعة التنفس .. حدوث انسحاب في عضلات الصدر تحت او بين الضلوع مع التنفس ..عدم القدره علي الرضاعه .. النته او الزرقان مرحله متاخره جدا .
كحة حساسية الانف:
.. وبيكون سببها الافرازات الانفيه اللي بتنزل علي الصدر واهم شئ في علاجها هو ايقاف هذه الإفرازات.
كحةcystic fibrosis وده مرض وراثي بيعمل كحه بشكل متكرر وبلغم بكميات كبيره وتشخيصه له مواصفات معينه يعرفها اطباء الصدر لكن يمكن للابوين ان يشكوا فيه لو لاحظوا ان عرق ابنهم مالح بشكل ملحوظ ( بيلاحظوا ملوحة الجلد لما يبوسوا ابنهم ) .
طبعا الواحد صعب يجمع كل اسباب الكحه في بوست واحد والا هيكون كبير اوي لكن حاولت اقول اهم واشهر اسباب الكحه وفي النهايه نصيحتي هي ضرورة معرفة سبب الكحه عشان تتعالج صح ونعرف هتتحسن في مدي اد ايه وايه علامات الخطوره اللي ناخد بالنا منها .
