حبي نفسك?
معني حبي نفسك النهارده هايرتبط بازاي تحميها?
…لما حد بيحب حد بيدور ازاي يحميه ..طب هاتحمي نفسك من ايه ؟
هو ده حوارنا النهارده .
?انا غبيه ،،انا زوجه فاشله ،،مافيش فايده فيا ،، انا حياتي زفت?وزي ده كلام كتير بنقوله لنفسنا ومش عارفين خطورته?
الحوار اللي بيدور جوه النفس …ده من اخطر المشاكل اللي بتقابل كل ست ..بيقابل الستات عموما لانها دايما الطرف الأضعف في العلاقه الزوجيه… الطرف اللي بيضغط علي نفسه وبيبلع الظلط عشان العلاقه تستمر ،تسكت عشان تعدي الموقف ، بس هاتصرف انفعالاتها دي ازاي ؟..
بتفضل تكلم نفسها جواها وتبرر وتشتم وتفكر وتكيد وتعيط ?
احمي نفسك من الافكار السلبيه? انا كذا ..وكذا ..اللي بتترجم علطول لانفعالات سلبيه? تبقي متضايقه وحزينه وكئيبه وبعدها تتحول لأفعال سلبيه? تبداي تدوري الضرب في ولادك .. تفشي خلقك فيهم لأنهم الطرف الأضعف منك ..وفيه ناس تخربش نفسها وتئذيها ..وفيه ناس تكتم ويجي ليها أمراض ضغط وسكر وووووو…فبتعملي دايره من الكُره والعنف حواليكي ..دايره كلها سلبيه
امتي بتيجي وبتبدا الافكار السلبيه ؟؟
لو غاب الحوار الخارجي البناء …يعني حوارك مع زوجك كله مشاحنات وزعل ..بتفضلي تسكتي ..وهو يسكت ..كل واحد بيدور في دايره السلبيه.كل واحد بيعيش في عالم خاص بيه ويكبره ويبعد عن الطرف الاخر
الحل ايه بقي?
١-انك لازم تعبري عن مشاعرك ،،لازم تبني حوار مثمر مع زوجك .. لازم تحاولي تعبري عن اللي جواكي
٢-اول ماتيجي ليكي الافكار دي استعيذي بالله وماتتماديش فيها وامسكي قران وأقري هاترتاحي..اشكي لربك وأحكي وانتي بتصلي
٣-ماتسيبيش نفسك فاضيه..وقت فراغك لازم تمليه ..اما بدراسه..او شغل ..او عمل تطوعي
٤- وقت مايبدا الحوار الداخلي وقفي تفكيرك وحاولي تفكري بايجابيه
يعني
حوار جواكي كالآتي ..انا زوجه فاشله ، ماهوش بيحبني اصلا .مافيش فايده فيا …وقفي فورا وفكري …هو اتجوزني ليه ..اكيد عشان مميزاتي كذا وكذا ..طيب هل لو ماكنش بيحبني كان هايفضل متجوزني ? ..اكتبي مميزاتك وافرحي بيها وحاولي تفتكريي دايما انك بني آدم ..ربنا خلقنا كده بنغلط ..مانتيش ملاك ..خلقنا بنغلط وماحدش فينا كامل
☘️عشان ☘️
نتعلم من اخطائنا مش نجلد نفسنا .. خلقنا بنغلط عشان ندرك ضعفنا فنلجا ليه ..خلقنا بنغلط عشان نرحم بعض ونرحم ضعف بعض
حبي نفسك وبلاش تجلديها
لازم تتقبلي ذاتك..وبعدها تحميها ..وبعدها تنميها وتطوري منها
والموضوع ده من واقع استشارات كتير بتجيلي ..بتكون الست واقفه علي الطلاق بسبب مشاكل كتير ..بعد البحث والمعلومات منها بلاقي السبب كثره النقد من زوجها ليها …فتبدأ المشاكل زي ماقولنا فوق ?
عشان كده حبيت ألقي الضوء علي النقطه دي
واتمني تكونوا استفدتم ❤️
